អតិថិជនវីង ២១នាក់ ឈ្នះរង្វាន់ធំពីកម្មវិធី “ធ្វើប្រតិបត្តិការដើម្បីឈ្នះរង្វាន់”

ព័ត៍មានថ្មីៗ

ធ្នូ 28, 2018

ក្នុងរយៈពេលប្រហែលមួយខែ បន្ទាប់ពីប្រកាសអំពីកម្មវិធី “ធ្វើប្រតិបត្តិការដើម្បីឈ្នះរង្វាន់” របស់ខ្លួន ធនាគារឯកទេសវីង (ខេមបូឌា) លីមីតធីត បានធ្វើការចាប់រង្វាន់ជាលើកដំបូង ដើម្បីស្វែងរកអ្នកឈ្នះរង្វាន់ចំនួន ២១ នាក់ ដែលនឹងទទួលបានរង្វាន់ជាច្រើន បន្ទាប់ពីពួកគាត់បានធ្វើប្រតិបត្តិការតាមរយៈគណនីវីង។

អ្នកឈ្នះរង្វាន់ដំបូងទាំង២១នាក់ ស្ថិតនៅក្នុងចំណោមអតិថិជនរាប់ពាន់នាក់របស់វីង ដែលតែងតែធ្វើប្រតិបត្តិការជាប្រចាំដូចជា វីងទៅវីង វីងវេរលុយ ផ្ទេរប្រាក់ទៅក្រៅប្រទេស បញ្ចូលទឹកប្រាក់ទូរស័ព្ទ, ទូទាត់វិក្កយបត្រឬដកប្រាក់ ពីគណនីវីង។ រង្វាន់សម្រាប់អ្នកឈ្នះរង្វាន់ទាំង២១នាក់រួមមាន ទូរទស្សន៍ស្មាតធីវី ទំហំ ៣២ អ៊ីញ៖ ៧រង្វាន់ ម៉ាស៊ីនបោកគក់៖ ៧រង្វាន់ ទូទឹកកក៖ ៧ រង្វាន់។

មានប្រសាសន៍នៅក្នុងពិធីចាប់រង្វាន់ ដែលប្រព្រឹត្តនៅការិយាល័យកណ្តាលរបស់ ធនាគារឯកទេសវីង លោក ម៉ានូ រ៉ាចាន់ អគ្គនាយកពាណិជ្ជកម្មរបស់វីងបាននិយាយថា វីងមានក្តីរំភើបណាស់ដែលបានចូលរួមផ្តល់រង្វាន់ជាច្រើនក្នុងការប្រារព្ធគម្រប់ខួប ១០ ឆ្នាំរបស់ធនាគារ ដែលបានផ្តល់សេវាកម្មហិរញ្ញវត្ថុនៅកម្ពុជា ក៏ដូចជាភាពជោគជ័យដែលធនាគារសម្រេចបាននៅក្នុងឆ្នាំ ២០១៨ ។

លោក រ៉ាចាន់ មានប្រសាសន៍បន្តទៀតថា “ក្នុងពេលដែលវីងបន្តណែនាំពីផលិតផលនិងសេវាកម្មដែលប្រកបដោយភាពច្នៃប្រឌិត ដើម្បីជួយបង្កើនជីវភាពរស់នៅប្រចាំថ្ងៃរបស់ប្រជាពលរដ្ឋកម្ពុជា យើងមិនដែលភ្លេចឡើយ នូវការសំដែងសេចក្តីថ្លែងអំណរគុណដល់អតិថិជន រាប់លាននាក់របស់យើង ដែលតែងតែជួយវីងឱ្យបន្តឆ្ពោះទៅមុខជានិច្ច ទោះបីជាក្នុងស្ថានភាពដ៏លំបាកក៏ដោយ។ ខ្ញុំក៏សូមជូនពរដល់អតិថិជនទាំងអស់ ក៏ដូចជាក្រុមគ្រួសាររបស់ពួកគេ នូវភាពសប្បាយរីករាយ និងភាពរុងរឿងនៅក្នុងឆ្នាំ២០១៩ ខាងមុខនេះ។ ”

កម្មវិធីប្រម៉ូសិន “ធ្វើប្រតិបត្តិការដើម្បីឈ្នះរង្វាន់” គឺជាផ្នែកមួយនៃកម្មវិធីប្រូម៉ូសិនជាច្រើនរបស់ ធនាគារ ឯកទេស វីង ដែលធ្វើឡើងដើម្បីសម្តែងសេចក្តីថ្លែងអំណរគុណដល់អតិថិជនរបស់ខ្លួន ចំពោះការគាំទ្រលើផលិតផល និង សេវាកម្មរបស់វីង ក្នុងរយៈពេល ១០ ឆ្នាំកន្លងមកនេះ។ កម្មវិធីប្រូម៉ូសិននេះ ត្រូវបានធ្វើឡើងបន្ទាប់ពីកម្មវិធីប្រូម៉ូសិន ទូទាត់ថ្លៃសំបុត្ររថភ្លើងទៅកាន់ស្រុកកំណើតក្នុងតម្លៃតែ ៤០រៀល កាលពីមុនពិធីបុណ្យភ្ជុំបិណ្ឌ ក្នុងខែតុលា កន្លងមក។

ចាប់ពីថ្ងៃទី ២០ ខែវិច្ឆិកា ឆ្នាំ ២០១៨ រហូតដល់ថ្ងៃទី ២៨ ខែកុម្ភៈ ឆ្នាំ ២០១៩ រាល់អតិថិជនវីង ដែលធ្វើប្រតិបត្តិការដូចជា វីងទៅវីង វីងវេរលុយ ផ្ទេរប្រាក់ទៅក្រៅប្រទេស បញ្ចូលទឹកប្រាក់ទូរស័ព្ទ ទូទាត់វិក្កយបត្រ ឬដកប្រាក់ពីគណនីវីង ពួកគាត់នឹងមានឱកាសឈ្នះរង្វាន់ម៉ូតូ ១រង្វាន់ និងសម្ភារៈប្រើប្រាស់ក្នុងផ្ទះជាច្រើនទៀត រួមមាន ទូរទស្សន៍ស្មាតធីវីចំនួន ១៥រង្វាន់ ទូទឹកកកចំនួន ១៣រង្វាន់ និងម៉ាស៊ីនបោកគក់ ចំនួន ១៣ រង្វាន់។