Liquid Group និង ធនាគារឯកទេសវីង សហការគ្នាជម្រុញការទូទាត់ឆ្លងប្រទេសមកកម្ពុជា
ព័ត៍មានថ្មីៗអតិថិជនរបស់ក្រុមហ៊ុន Liquid Group និងដៃគូរបស់ខ្លួនអាចធ្វើការទូទាត់តាម QR កូដជាមួយអាជីវករជាង ៤ ម៉ឺននាក់នៅក្នុងប្រទេសកម្ពុជា
Liquid Group ដែលជាក្រុមហ៊ុនបណ្តុំសេវាទូទាត់តាមទូរស័ព្ទចល័តក្នុងតំបន់ហើយមានទីស្នាក់ការកណ្តាលនៅប្រទេសសិង្ហបុរី នឹងចាប់ដៃគូជាមួយធនាគារឯកទេសវីង (ខេមបូឌា) លីមីតធីត ដែលជាអ្នកផ្តល់សេវាធនាគារចល័តឈានមុខគេនៅកម្ពុជា ដើម្បីជម្រុញការទូទាត់តាម QRកូដ នៅប្រទេសកម្ពុជា។
លោក ម៉ានូ រ៉ាចាន់ អគ្គនាយកនៃធនាគារឯកទេស វីង បានមានប្រាសន៍ថា៖ “យើងមានការរំភើបនិងពិតជាទន្ទឹងរងចាំការសហការ ជាមួយ Liquid Group ដែលជាអ្នកផ្តល់បណ្តុំនៃសេវាកម្មទូទាត់ប្រាក់តាមQR កូដឈានមុខគេមួយ។ ការសហការនេះឆ្លុះបញ្ចាំងពីវិធីសាស្រ្តរបស់យើងក្នុងការផ្តល់នូវភាពងាយស្រួលនៃការទទួលបានសេវាហិរញ្ញវត្ថុតាមទូរស័ព្ទចល័តដែលមានសុវត្ថិភាព មានការការពារ និងឆាប់រហ័សដល់អតិថិជនគ្រប់រូបតាមរយៈប្រព័ន្ធហិរញ្ញវត្ថុ និងដៃគូដ៏រឹងមាំរបស់យើងនៅក្នុងតំបន់។ ធនាគារឯកទេស វីង តែងតែខិតខំប្រឹងប្រែងក្នុងការស្វែងរកអ្វីថ្មីៗបន្ថែមទៀតសម្រាប់អតិថិជនរបស់យើង។”
ជាមួយនឹងភាពជាដៃគូនេះ Liquid Group និងធនាគារឯកទេស វីង នឹងគាំទ្រដល់ការប្រើប្រាស់មធ្យោយបាយទូទាត់ការចំណាយជាមួយ QR កូដ រវាងអតិថិជននិងអាជីវករ តាមរយៈការអនុញ្ញាតឲ្យដៃគូពាណិជ្ជកម្មរបស់វីងនៅទូទាំងព្រះរាជាណាចក្រកម្ពុជាទទួលយកការទូទាត់តាមកម្មវីធីទូរស័ព្ទដែលមាន QR កូដរបស់ក្រុមហ៊ុន Liquid Group និងដៃគូរបស់ខ្លួន។ ភាពជាដៃគូនេះក៏នឹងជួយបង្កើនចំនួនដៃគូអាជីវករនៅក្រៅប្រទេសរបស់ Liquid Group ឲ្យមានកាន់តែច្រើនថែមទៀត។
បង្កើតឡើងក្នុងឆ្នាំ ២០០៩ ធនាគារឯកទេស វីង គឺជាស្លាកសញ្ញាពាណិជ្ជកម្មមួយដែលត្រូវបានគេទទួលស្គាល់និងទុកចិត្តបំផុតមួយនៅក្នុងទីផ្សារសេវាទូទាត់ប្រាក់តាមទូរស័ព្ទនិងអេឡិចត្រូនិចដែលមានបណ្តាញភ្នាក់ងារវីងជាង ៨០០០ កន្លែងនៅទូទាំងប្រទេសដែលបំរើជូនអតិថិជន ៥ លាននាក់នៅក្នុងព្រះរាជាណាចក្រកម្ពុជា។
លោក Jeremy Tan ស្ថាបនិកនិងជានាយកប្រតិបត្តិក្រុមហ៊ុន Liquid Group បានមានប្រសាសន៍ថា៖“ បន្ទាប់ពីការបង្កើតនូវសមាហរណកម្មបណ្តាញទូទាត់តាមតំបន់របស់យើងគឺ XNAP នៅឆ្នាំ ២០១៩ យើងមានក្តីរំភើបក្នុងការឈានចូលឆ្នាំទី ២ នៃការបើកច្រកថ្មីនៅទូទាំងតំបន់ដើម្បីសម្រួលដល់ការទូទាត់តាម QR កូដឆ្លងដែនជាលក្ខណៈអន្តរជាតិ នៅក្នុងប្រទេសសិង្ហបុរី ហុងកុង ឥណ្ឌូនេស៊ី ហ្វីលីពីន តៃវ៉ាន់ ថៃ ហើយនាពេលឥឡូវនេះ នៅក្នុងប្រទេសកម្ពុជា ។ យើងរីករាយក្នុងការធ្វើជាដៃគូជាមួយវីងដែលជាជាអ្នកផ្តល់សេវាកម្មធនាគារតាមទូរស័ព្ទចល័តដំបូងគេនៅកម្ពុជា ហើយអនុញ្ញាតឱ្យយើងគាំទ្រដល់បរិយាប័នហិរញ្ញវត្ថុទៅកាន់អ្នកមិនមានគណនីធនាគារ និងមិនស្ថិតក្នុងបណ្តាញធនាគារ ស្របជាមួយគោលដៅរបស់យើងក្នុងការអភិឌ្ឍសង្គមមួយដែលមិនចាំបាច់ប្រើប្រាស់ក្រដាស់ប្រាក់នៅទូទាំងតំបន់។”
Liquid Group ក៏នឹងធ្វើជាដៃគូជាមួយធនាគារឯកទេស វីង ដើម្បីផ្តល់ជូននូវសេវាកម្មដែលមានគុណតម្លៃបន្ថែមប្រកបដោយភាពច្នៃប្រឌិតដល់អតិថិជនរបស់ពួកគេតាមរយៈសមាហរណកម្មនៃការទូទាត់ប្រាក់ឆ្លងប្រទេសនិងវេទិកាទីផ្សារសម្រាប់ដៃគូ។
